lundi 11 décembre 2017

முரச பந்தம்


சித்திர கவிதை
முரச பந்தம்
  
கவிபாரதி சீரை மீட்டுகவே!
புவி..பாரதி சீரை நாட்டுகவே!
சுவைபாரதி சீரை யீட்டுகவே!
அவை..பாரதி சீரை யூட்டுகவே!
  
பாடல் விளக்கம்
  
மகாகவி பாரதியின் சீரை மீட்டுகவே! புவியே, பாரதியின் சீரை நாட்டி உயருகவே. இனிக்கும் கவிதைகளைப் படைத்த பாரதியின் சீரை ஈட்டுகவே. கவிபாடும் அவையே, பாரதியின் சீரை உலகுக்கு ஊட்டுகவே!
  
முரச பந்தமாவது, நான்கடிகளை உடையதாய் மேலிரண்டடியும் தம்முட் கோமூத்திரியாகவும், கீழிரண்டடியும் தம்முட் கோமூத்திரியாகவும் நாடா கட்டிய வழியில் முதலடி முதல் தொடங்கி இரண்டாமடியிலும் மூன்றாமடியினும், நான்காமடியினும் கீழுற்று மீண்டு மேலேபோய்க் கீழேயிறங்கி முடியவும், இவ்வாறே இறுதியடி முதல் தொடங்கி மேலேபோய்க் கிழேயிறங்கி மேலே போய் முடியவும் இரண்டாம் அடி முதலடியுடனும், மூன்றாம் அடி நான்காம் அடியுடனும் கோமூத்திரியாக எழுத்துக்கள் அமையப் பாடப்படுவதாகும்.
  
பாட்டரசர் கி. பாரதிதாசன்
தலைவர்
கம்பன் கழகம் பிரான்சு
உலகத் தொல்காப்பியத் தலைமை மன்றம்
11.12.2017

samedi 9 décembre 2017

சுழிகுளம்



சித்திர கவிதை
சுழிகுளம்
  
கவிமக தா!தா! மாதே!
வியனரு மானே! தேமா
மனநவு வா!தே னே!தா!
கருவுரு நீ!வா! மாதா!
  
விளக்கம்
  
கவிமகளை எனக்குத் தா!தா! மாதே
வியக்கும் அருமை மானே!
தேமாபோல் மனம் நெகிழ வா! தேனே தா!
நான் பாடும் பாட்டுக்குக் கருவை உருப்பெறச் செய்பவள் நீ!
என் மனத்துக்கள் வருக என் தாயே!
  
பாட்டரசர் கி. பாரதிதாசன்
தலைவர்
கம்பன் கழகம் பிரான்சு
உலகத் தொல்காப்பியத் தலைமை மன்றம்
09.12.2017   

vendredi 8 décembre 2017

திரிபாகி

திரிபாகி - 1
ஒரு சொல்லில் மூன்று சொற்கள்
  
மூன்றெழுத்துகளைச் சோ்க்க ஒரு சொல்லாகியும், அதன்கண் உள்ள முதலெழுத்தையும் இறுதியெழுத்தையும் சேர்க்க மற்றொரு சொல்லும், இடையெழுத்தையும் கடையெழுத்தையும் சேர்க்கப் மற்றொரு சொல்லும் வருவது திரிபாகியாகும் [திரி - மூன்று] [பாகி - பாகமுடையது]
  
சீர்தரும் செல்வி திகழிருக்கை மூன்றெழுத்து!
பேர்..தரும் வாலிபிணை முன்,னீறு! - தார்தரும்
பாமரைக் கம்பனின் பொன்படைப்பாம் ஈற்றிணை!
தாமரை! தாரை! மரை!
  
மூன்றெழுத்தால் வந்த சொல் தாமரை [ திருமகள் அமரும் பூ]
  
தாமரை என்ற சொல்லில் முதல் எழுத்தையும் ஈற்றெழுத்தையும் சேர்க்க தாரை என்ற சொல் வரும் [ இராமாயணத்தில் வரும் வாலி மனைவியின் பெயர்]
  
தாமரை என்ற சொல்லில் ஈற்றில் உள்ள இருவெழுத்து மரை [ மரை என்றால் மான். இராமாயணத்தில் பொன்மானைப் பெண்மான் கேட்கும் காட்சியைக் காணலாம்]
  
எண்ணிய மூன்று பெயர்களை ஈற்றடியில் வரும் வண்ணம் படைப்பது ஒருவகை திரிபாகியாகும்.
  
---------------------------------------------------------------------------------------
  
திரிபாகி - 2
  
முன்வரும் ஈரெழுத்து முன்தோற்றம்! மண்விளையும்
பின்வரும் ஈரெழுத்து! முன்னீறும் - இன்னீதழ்
எந்திவரும்! ஈற்றெழுத்[து] இன்பமருள் மாதம்!சீர்
நீந்திவரும் சொல்லை நிறுவு!
  
சீர் நீந்திவரும் சொல் - கவிதை
முன்வரும் ஈறெழுத்துக் கவி - குரங்கு [ மனிதர்களின் தோற்றம்]
பின்வரும் ஈரெழுத்து விதை - மண்விளையும்
முன்னெழுத்தும் ஈற்றெழுத்தும் சேர்ந்தால் கதை - இதழ்களில் வெளிவரும்.
ஈற்றெழுத்துத் தை - தமிழர்களின் புத்தாண்டு
  
இப்படி அமையும் பாடலும் திரிபாகி வகையைச் சேரும்.
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்.
08.12.2017

mercredi 6 décembre 2017

மாத்திரைச் சுருக்கம்

மாத்திரைச் சுருக்கம்
  
குற்றெழுத்துக்கு ஒரு மாத்திரை. நெட்டெழுத்துக்கு இரண்டு மாத்திரை. ஒரு சொல்லுக்கு ஒரு பொருளுரைத்து. அச்சொல்லின் மாத்திரையைக் குறைத்து வேறு பொருள் பயக்கும்படி பாடப்படுவது மாத்திரைச் சுருக்கமாகும். [நெடிலில் தொடங்கும் சொல்லைக் குறிலாக மாற்றிப் பொருள் கொள்ளும் பாடல்]
  
எண்ணொன்று இறங்கும் எழில்சேலை மேனியளே!
எண்ணொன்று இறங்கும்பொற் றார்மகளே! - பண்மகளே!
எண்ணொன்று இறங்கும் தொழிற்கூடத் தண்மகளே!
கண்ணிங்குக் காணும் கனவு!
  
விளக்கம்
  
சேலை - சீலை, இதில் ஒரு மாத்திரை நீக்க, சிலை - சிலை போன்ற மேனியைக் கொண்டவளே.
  
தார் - மாலை, இதில் ஒரு மாத்திரை நீக்க, மலை - மலைமகளே
  
தொழிற்கூடம் - ஆலை, இதில் ஒரு மாத்திரை நீக்க, அலை - அலைமகளே!
  
பண்மகளே - கலைமகளே
  
முப்பெரும் தேவியாக அவள் விளங்குகின்றாள். அவள் மேனி சிலைபோல் ஒளிர்கிறது. அவளை எண்ணிக் கனவுகள் பெருகுகின்றன.
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்.
06.12.2017

samedi 2 décembre 2017

சிவன் சிலேடை வெண்பா!


சிவன் சிலேடை வெண்பா!
  
1.
சிவனும் தேங்காயும்

நீரேந்தும்! வெண்மை நிறமேந்தும்! கண்மூன்றின்
சீரேந்தும்! செம்மைச் சடையேந்தும்! - பாரேந்தும்!
போற்றும் புகழேந்தும்! ஓடேந்தும்! தேங்காயும்
ஆற்றல் சிவனும் அறி!
  
2.
சிவனும் தமிழும்

தென்னெனும் பேரேந்தும்! மின்னெனும் சீரேந்தும்!
பொன்னெனும் வண்ணம் புகழேந்தும்! - இன்பெனும்
சங்கத் தமிழாண்டும் தண்ணேந்தும் ஈசனையும்
தங்கத் தமிழையும் சாற்று!
  
3.
சிவனும் திருமாலும்

நீருடையான்! நெற்றியில்வெண் கோடுடையான்! நன்மணத்
தாருடையான்! கன்னல் தமிழுடையான்! - சீருடையான்!
தேருடையான்! பாம்புடையான்! தேவிவாழ் மெய்யுடையான்!
காருடைய மால்,சிவன் காண்!
  
4.
சிவனும் வானும்

நீரூற்றும்! வெண்பிறை நீந்தும்! திருஞானச்
சீரூட்டும்! செந்தமிழைச் சேர்த்துாட்டும்! - பாரோங்க
மின்னொளி ஏந்தும்! விரிவானை நற்சிவனைப்
பொன்னொளி ஏந்தும் பொலிந்து!
  
5.
சிவனும் பாம்பும்

நீல விடமுண்டாம்! நீண்ட உருவுண்டாம்!
ஞாலப் புகழ்ச்சீர் நனியுண்டாம்! - கோல
நடமுண்டாம்! கூறிரு நாக்குண்டாம்! காணும்
படமுண்டாம்! பாம்பீசன் பார்!
  
6.
சிவனும் திருக்குறளும்

அறம்நல்கும்! ஆண்மை மறம்நல்கும்! இன்பத்
திறம்நல்கும்! செம்பொருள் நல்கும்! - பிறப்பின்
பயன்சேர் அடியிரண்டைப் பற்றியுயிர் ஓங்கும்!
நயன்சேர் குறளீசன் நாடு!
  
7.
சிவனும் சிங்கமும்

அரசப் பெயருண்டாம்! ஆண்மைநடை யுண்டாம்!
சிரசில் சடையுண்டாம்! சேர்ந்த - இருளடர்
காடுண்டாம்! வன்னரிக்கும் காக்கும் சிவனுக்கும்
பீடுண்டாம் என்றும் பிணைந்து!
  
8.
சிவனும் காற்றும்

உலகாளும்! நம்மின் உயிராளும்! நாளும்
நிலமுணர ஆட்டுவிக்கும்! நெஞ்சுள் - குலவுநலம்
கூட்டும்! குளிரூட்டும்! கோலமிகு நன்மணத்தைச்
சூட்டும் சிவன்,காற்றுச் செப்பு!
  
9.
சிவனும் ஆசிரியரும்

இருளகற்றி நெஞ்சுள் இருந்திடுவார்! உண்மைப்
பொருள்திரட்டி மேன்மை பொழிவார்! - குருவெனும்
பேருறுவார்! ஞானக்கண் தான்திறப்பார்! பேறுறும்
சீர்ச்சிவன் ஆசிரியர் செப்பு!
  
10.
சிவனும் காதலியும்

பொட்டுண்டு! பூவுண்டு! பொன்னொளித் தோடுண்டு!
கட்டுண்டு! பட்டுண்டு! காண்பிறைச் - சொத்துண்டு!
தாண்டவம் பித்தமுண்டு! தாய்தரும் அன்புண்டு!
வேண்டுசிவன், காதலியா மே!
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்.
01.12.2017

vendredi 24 novembre 2017

மாத்திரைப் பெருக்கம்



மாத்திரைப் பெருக்கம்
  
குற்றெழுத்துக்கு ஒரு மாத்திரை. நெட்டெழுத்துக்கு இரண்டு மாத்திரை. ஒரு சொல்லுக்கு ஒரு பொருளுரைத்து. அச்சொல்லின் மாத்திரையைக் கூட்டி வேறு பொருள் பயக்கும்படி பாடப்படுவது மாத்திரைப் பெருக்கமாகும் [ குறிலில் தொடங்கும் சொல்லைக் நெடிலாக மாற்றிப் பொருள் கொள்ளும் பாடல்]
  
எண்ணென்று மேவும் எழுத்திணையும் நெஞ்சுடையாள்!
எண்ணென்று மேவும் எழில்மனத்தால் - வண்டமிழாள்!
எண்ணென்று மேவும் இளம்மெய்யாள்! இன்பமுறக்
கண்ணென்று கொஞ்சிக் களி!
  
எண்ணென்று மேவும் - ஒரு மாத்திரை கூடி
  
எழுத்திணைந்தால் - அசை, இதில் ஒரு மாத்திரையைக் கூட்டினால் ஆசை. ஆசை நெஞ்சுடையாள்.
  
மனம் - அகம், இதில் ஒரு மாத்திரையைக் கூட்டினால் ஆகம் - மார்பு. எழிலான மார்பினை உடையவள்.
  
மெய் - உடல், இதில் ஒரு மாத்திரையைக் கூட்டினால் ஊடல் - கலவிப்பிணக்கம்.
பிணக்கம் தீர்ந்து இன்பமுறக் கண்ணே என்று கொஞ்சிக் களிக்கவும்
  
பாட்டரசர் கி. பாரதிதாசன்
24.11.2017

-----------------------------------------------------------------------------
  
மாத்திரைப் பெருக்கம் - 2
  
படியொன்று ஏறியே வானில் பறக்கின்றேன்!
குடியொன்று ஏறியே நெஞ்சம் குதிக்கின்றேன்!
அடியொன்று ஏறியே உம்மை அழைக்கின்றேன்!
கொடியொன்று ஏறியே அன்பைக் கொடுக்கின்றேன்!
  
படி - பாடிப் பறக்கின்றேன்.
குடி - கூடி நெஞ்சம் குதிக்கின்றேன்.
அடி - ஆடி அழைக்கின்றேன்.
கொடி - கோடி அன்பைக் கொடுக்கின்றேன்.
  
பாட்டரசர் கி. பாரதிதாசன்
01.08.2016
  
-----------------------------------------------------------------------------
  
மாத்திரைப் பெருக்கம் - 3
  
அலையிங்கு நீண்டுவரக் கூடம் செல்வோம்!
   அசையிங்கு நீண்டுவரக் காதல் கொள்வோம்!
மலையிங்கு நீண்டுவர வாகை ஏற்போம்!
   மரையிங்கு நீண்டுவர நெஞ்சம் காப்போம்!
கலையிங்கு நீண்டுவர விடிவைக் காண்போம்!
   கடையிங்கு நீண்டுவரப் புள்ளைப் பார்ப்போம்
வலையிங்கு நீண்டுவரக் கவியைச் சொல்வோம்
   வரமிங்கு நீண்டுவரக் காலம் வெல்வோம்!
  
அலை - ஆலை [தொழிற்கூடம்]
அசை - ஆசை [ காதல்]
மலை - மாலை [ வாகை]
மரை - மாரை [ நெஞ்சு]
கலை - காலை [விடியல்]
கடை - காடை [புள்]
வலை - வாலை [கவி - குரங்கு]
வரம் - வாரம் [காலம்]
  
பாட்டரசர் கி. பாரதிதாசன்
24.11.2017

செல்லமடி நீயெனக்கு!





செல்லமடி நீயெனக்கு!

1.
பாடுதடி என்னெஞ்சம்! பாவையுன் நல்வரவால்
கூடுதடி இன்பம் கொழித்து!

2.
ஏங்குதடி உள்ளம்! இளமைக் கவிபாடித்
தாங்குதடி கன்னல் தமிழ்!

3.
கொஞ்சுதடி மாங்கிளிகள்! கோதையுன் பேரழகு
விஞ்சுதடி கண்முன் விரிந்து!

4.
மின்னுதடி எண்ணங்கள்! வெல்லும் விழியிரண்டும்
பின்னுதடி என்னைப் பிடித்து!

5.
நாடுதடி உன்னருளை! நாளும் உறவாடிச்
சூடுதடி காதல் சுவை!

6.
சேருதடி ஆசையலை! சித்திரமே! பொற்கனவு
ஊருதடி என்னுள் ஒளிர்ந்து!

7.
பருகுதடி பார்வை! உருகுதடி உள்ளம்!
பெருகுதடி காதலெனும் பித்து!

8.
மணக்குதடி மல்லி! மயக்குதடி மாலை!
கணக்குதடி மேனி கனத்து!

9.
பூக்குதடி பொற்சோலை! உன்னுடைய புன்னகை
ஆக்குதடி அன்பாம் அமுது!  

10.
செல்லமடி நீயெனக்கு! செல்வமடி நீயெனக்கு!
பல்குமடி இன்பம் படர்ந்து!

பாட்டரசர் கி. பாரதிதாசன்
24.11.2017

samedi 18 novembre 2017

பஞ்சபங்கி




ஒன்றில் ஐந்து
[பஞ்சபங்கி]

பஞ்சபங்கியென்பது, ஒரு பாடலை இலக்கண முறைப்படி 5 பாடல் வரும்படி அமைப்பதாம்.

ஒரு நேரிசையாசிரியப்பாவில் 1. கட்டளைக்கலித்துறை, 2. கலிவிருத்தம், 3. குறள் வெண்பா, 4. நேரிசை வெண்பா, 5. குறளடி வஞ்சிப்பா வரும்படி அமைந்திருப்பதைக் கண்டு களிப்பீர்.

என்னவள்!

நேரிசையாசிரியப்பா
கலைமணம் வீசும் கனிந்த தமிழைத்
தலைத ரித்தாள்! நிலைமனம் தாங்கி
அலைவளம் ஏந்தி நிறைய ளித்தாள்!
மலைவளம் கொண்ட மலருளம் கண்ட
மதிமு கத்தாள்! சிலையென வந்தாள்
நதிந லத்தாள்! இந்நாள்சீர் உறுமே!
கண்கள் இரண்டும் கவிகள் வழங்கும்
பெண்கள் பேசும் பெருமை முழங்கும்!
பண்கள் பிறந்து பசுமை படைக்கும்!
தண்..கள் மொழியாள்! தமிழின் இனியாள்!
மூக்கு வடிவெழில் மூளையை நன்றாகக்
தாக்கும் துயரினைத் தந்து, வண்ண
இதழ்கள் வழங்கும் இனிமையால் எண்ணம்
நதியாய் எழுந்தாடும்! நண்ணும் நலமே!
நடையோ நடனம் தருமே! வளமே
படைப்பாள் மகிழ்ந்து!  பாடு மனமே
இன்ப எழிலை! சூடு மனமே
அன்பின் அணியை! ஆடு மனமே
அமுத மனமே! காடு மணமே
கமழும் அழகை, கன்னல் அழகை,
கவிதை யழகை, கன்னி அழகை,
புவியோர் போற்றக் காதல் நல்கும்
என்பேன்! நாளும் இனிமை பல்கும்
என்பேன்! பசுமை யாவும் படர்ந்து
சுடரும் என்பேன்! சுவைச்சீர்
தொடரும் என்பேன் தோகை விரித்தே!

கட்டளைக் கலித்துறை

கலைமணம் வீசும் கனிந்த தமிழைத் தலைதரித்தாள்!
நிலைமனம் தாங்கி அலைவளம் ஏந்தி நிறையளித்தாள்!
மலைவளம் கொண்ட மலருளம் கண்ட மதிமுகத்தாள்!
சிலையென வந்தாள் நதிநலத் தாள்!இந்நாள் சீர்பெறுமே!

கலிவிருத்தம்

கண்கள் இரண்டும் கவிகள் வழங்கும்!
பெண்கள் பேசும் பெருமை முழங்கும்!
பண்கள் பிறந்து பசுமை படைக்கும்!
தண்..கள் மொழியாள்! தமிழின் இனியாள்!

குறள் வெண்பா

மூக்கு வடிவெழில் மூளையை நன்றாகக்
தாக்கும் துயரினைத் தந்து,

நேரிசை வெண்பா

வண்ண இதழ்கள் வழங்கும் இனிமையால்
எண்ணம் நதியாய் எழுந்தாடும்! - நண்ணும்
நலமே! நடையோ நடனம் தருமே!
வளமே படைப்பாள் மகிழ்ந்து!

வஞ்சிப்பா

பாடுமனமே இன்பவெழிலை!
சூடுமனமே அன்பினணியை!
ஆடுமனமே! அமுதமனமே!
காடுமணமே கமழுமழகைக்
கன்னலழகை, கவிதையழகை,
கன்னியழகை, புவியோர்போற்றக்
காதல்
நல்கும் என்பேன்! நாளும் இனிமை
பல்கும் என்பேன்! பசுமை யாவும்
படர்ந்து சுடரும் என்பேன்! சுவைச்சீர்
தொடரும் என்பேன் தோகை விரித்தே!

பாட்டரசர் கி. பாரதிதாசன்
தலைவர்
கம்பன் கழகம் பிரான்சு
உலகத் தொல்காப்பியத் தலைமை மன்றம்
18.11.2017